Liebi Mitglieder, liebi Filmfründe vom pflegte Durschtlösche
Willkomme zur diesjährigen Uusgab vo de «Bilgerer Filmfeschtspiel» –
em einzigä Feschtival, wo d’Hauptrolle nöd ad Hollywood-Stars gönd,
sondern a durschtigi Lüüt.

🎞 Episode 1: D’Rückkehr vo de Bar
In de Haubtrolle: D’Zapfhahne (Mitglieder) – merci viel viel Mal für din Ufwand.
Nebedarsteller: Es paar flissigi Helfer, ohni die dä ganzi Barbetrieb gar nöd möglich wär – ah dere Stell: danke viel Mal! Die Komparserolle hätt dä Umsatz gha – isch au chli schüüch gsi.

7 Mal hämmer d’Bar mit Stolz uufgmacht – und jedes Mal mit dä Hoffnig, dass dä Rubel das Mol würkli rollt.
Joa...
Aber mir säged: Umsatz isch nöd alles – d’Stimmig isch unbezahlbar!
Und devo hämmer bekanntlich meh als gnueg gha. 🍻

🃏 Episode 2: S’Jassturnier – Ass, König, Trumpf!
Es organisatorischs Meisterwärch, en Publikums-Hit!
Voller Spannig, Emotione und leicht erhöhtem Bluetdruck.
Da isch alles debi gsi: taktischs Denken, debattiere, und natürlich s’einte oder anders Getränk für d’Nervä.
En Tag, wo de Roger Federer wahrschiinlich als «mentals Grand Slam» bezeichnet hätt.

🍻 Episode 3: Oberdorffest – Teil III: Dr Präsident schlaht zrugg
Nach drü Jahr Pause isch s’legendäri Oberdorffest ändlich wieder am Start gsi.
En volle Erfolg, es Summermärli in rot-wiis –
bis de Präsident denn i de Zwüschephase e chlini Leistigspause ihgleit het.
Mer chönt säge: Er hätt miteme guete Biispiel vorahgah.
und das hätt er au… allerdings Richtung Bode.
Aber wie heisst’s so schön?
Wer feschtet, der darf au mal abegheie.

🚌 Episode 4: Dr Bilgerer Fanausflug – Mission Herrliberg
Afang November isch’s los gange mit em Fanclub –
go luege, wie sich d’1. Mannschaft in Herrliberg schlaht.
En Tag voll Leidenschaft, Bier und Optimismus.
Aber wie im beschte Drama isch dä Twist grad in dä Halbzyt cho: Spielabbruch!
Wätter? Platz? Schiri? – völlig egal.
D’Stimmig hätt’s keis bitzli gstört.
Ganz im Gegentail:
Die zweit Halbzyt hämmer eifach i flüssiger Form no meh wieterführt –
i de Beiz, im Bus und im Härz vo allne, wo debi gsi sind. ❤️

🎬 Abspann
Es Jahr voll Highlights, voll Einsatz und ganz viel Bilgerer-Seel.
De Präsident sait:
Merci a alli, wo gholfe, trunke, glacht, organisiert und treit händ – vor allem mich.

Rico Hölzel

Präsident